政情：「忽然體育」 港府失「策」
隨住今屆巴西里約奧運舉行，本港又掀起一輪體育熱潮，就連曾經計劃將啟德體育城土地改為興建住宅，以及講過體育界無任何經濟貢獻嘅政府，都「忽然體育」聲言要向英國借鏡，全面檢視香港體育事業發展政策。本身係林大輝中學校監嘅立法會教育事務委員會主席林大輝（大輝），以及浸會大學體育學系副教授雷雄德就齊齊炮轟政府體育政策，又批評教育制度令學生冇時間做運動，產業發展又側重金融，令父母認為搞體育係浪費時間。
英國奧運獎牌多 即提借鏡
政府日前話，香港選手喺奧運嘅表現提醒大家對體育運動嘅關注，又指政府過去幾年做咗好多推動體育嘅工作，英國喺今屆奧運取得佳績，十分值得香港借鏡喎。大輝尋日就喺電台節目上揶揄「忽然體育」嘅政府，都唔知係咪見到英國攞多咗獎牌先至咁講，抑或係之前曾經深入研究而得出結論，否則下次第二個國家攞得多獎牌，係咪又要借鏡第二個國家嘅體育政策呢？
大輝又直斥，本港教育制度玩殘學生，唔好話冇時間做運動嘞，連做功課時間都唔夠，又要應付全港性系統評估（TSA），聲稱「德智體群美」，但就只重視「智」，忽視體育，加上本港產業側重金融，如果體育發展係冇機會，父母們都會認為唔應該嘥時間喺體育方面發展。所以要發展體育，都要檢討埋教育制度及認同體育對香港有價值先得，因為兩者係相輔相成嘅，擺明寸爆之前話體育界冇經濟貢獻嗰位。
檢討變協調 體育專員「縮水」
唔講唔知，原來雷雄德嘅囝囝赴英留學前都係林大輝中學學生，仲「籃足排手、乒羽網壁」都識玩。雷雄德就話，香港學界體育冇人睇，電視台體育新聞都冇埋，對體育唔重視。佢仲炮轟政府當初話會全面檢討體育政策，但五年嚟都停滯不前，好似依家設有嘅體育專員，就係「縮水版」體育專員︰「原本話全面檢視政策，依家施政報告就變咗協調跨局同跨部門工作，全面檢視、檢討嘅字眼冇晒！」
其實早前政府花五百萬元去宣傳奧運，又喺康文署轄下體育館搞直播、轉播，但使用人數極低，已經被嘲五百萬元唔知夠本港單車手李慧詩買幾多架單車。難為政府仲好意思話一直做好多推動工作，教育局局長吳克儉同體育專員楊德強等官員真係要面壁思過，檢討政策唔好一時貪口爽，咪當香港運動員係「臘鴨」！