中環出更：示威者怒打小人 斥「漢奸黎」大魔頭
每年驚蟄，都有市民去鵝頸橋打小人，雖然今年驚蟄已經過咗好耐，但有市民仍然忍唔住要去打小人，邊個小人唔打唔得？咪就係壹傳媒黎智英（漢奸黎）囉！尋日一早有二十多人去到漢奸黎位於何文田嘅寓所，將印有漢奸黎樣貌嘅紙張放喺地上打小人，仲怒斥漢奸黎係「大魔頭」同「千古罪人」，禍港殃民。
踩爛氣球洩憤
聲討漢奸黎嘅行動持續不斷，尋日朝早十時許，就有二十多人到漢奸黎寓所外抗議，佢哋帶同橫額和氣球到場，一字排開高叫口號，斥責漢奸黎係亂港嘅幕後黑手。之後佢哋又將印有漢奸黎樣貌同美國國旗嘅紙張放喺地上打小人，以及將氣球放喺地下踩爛以示不滿，佢哋逗留咗大約十分鐘就和平散去。
自六月十日起計，針對漢奸黎嘅示威抗議行動一浪接一浪，到漢奸黎寓所及將軍澳壹傳媒大樓外嘅抗議最少有四十九次，當中自稱係霸王國際集團員工及苦主嘅佔十次、正義聯盟佔三次、旅遊業界同其他人士則有三十六次。
卓妮