中環出更:四區會主席助陣 撐博愛籌款

博愛醫院早前為年度籌款重頭戲「博愛月全港籌款活動」舉行開幕儀式,由今個月底至明年三月為止,將喺全港十八區屋邨及街頭向市民籌款,博愛主席陳李妮、副主席彭少衍及李柏成等一眾董事局成員空群而出宣傳。既然要落區籌款,當然少不了家喻戶曉嘅星級大使及地區人士支持,包括北區、元朗、九龍城及葵青區議會主席都有到場助陣。

卓妮見北區區議會主席蘇西智及葵青區議會主席羅競成一早入場,齊為籌款旗開得勝加油助陣。陳李妮話,希望今次可籌到一千萬元善款。博愛副主席林群一早到場,但係坐定定唔多郁,原來佢當日朝早運動時扭親hip位,偏偏佢係當晚籌委會主席,而且當日又係博愛好重要嘅大日子,所以忍痛都要出席。

施家殷跨組織支持

當晚李柏成同蘇西智及羅競成好好傾,蘇西智話,佢喺二十年前博愛首次舉行屋邨籌款時就已經開始幫手籌款,同博愛好有感情喎!同博愛感情不薄嘅仲有樂善堂主席施家殷,當晚佢都同兩個唔同組織嘅好友現身支持,事關佢哋幫開博愛做地區籌款,就算佢做咗樂善堂大當家都唔例外。

博愛永遠顧問蕭成財都有出席儀式,佢笑言已經卸任十六年,但仍好有博愛心,事關博愛對佢個仔有救命之恩。原來當年佢做博愛主席時,兒子Vincent膽管閉塞,事出突然,住喺元朗嘅蕭成財第一時間將個仔送去博愛急症室,歷經七小時手術終於安全度過危境,難怪佢對博愛醫生嘅醫術讚不絕口喇!

卓妮

第一手消息請下載on.cc東網iPhone/iPad/Android/Windows Phone Apps