港府經常被批評為冇神經、冇靈魂，真係一啲都冇冤枉o架。就講奪去兩名消防員寶貴生命嘅工廈迷你倉大火吖，當局誓神劈願會嚴厲取締違規工廈單位，又實牙實齒話人命關天絕不妥協喎，實情係點？之唔係冇耳茶煲－－淨係得把口囉。
嗱，本報記者巡查多區舊式工廈嘅違規情況，結果發現好多單位都違反地契條款，用危機四伏嚟形容都唔誇張。最常見係改裝成派對出租場地，淨係觀塘區咋，起碼有十幾間，有啲場地仲會裝修成唔同主題，以時租或日租形式租畀顧客狂歡，尤其係家陣正值暑假旺季，幾乎日日都有大量年輕男女出入，一玩就玩到通宵達旦，萬一發生重大意外，分分鐘死得人多呀！
最牙煙嘅係，部分場地竟然設立「通宵BBQ區」，提供明火燒烤服務。本報記者觀察所見，其中一個BBQ區同層既有塑膠模製造廠，又有電機廠，加上場地並無標示逃生路線，防煙門長期中門大開，而且逃生樓梯擺滿雜物，危險程度比迷你倉有過之而無不及，唔出事猶自可，一出事不堪設想。仲有呀，部分派對場地提供留宿服務，房與房之間求其搵塊塑膠屏風隔開就算，都係惹火易燃之物，加上場地密不透風，萬一突然起火，實行一鑊熟都似。
睇到喇，淨係觀塘區已經七國咁亂，到底全港仲有幾多都市炸彈，真係諗吓都怕怕。大家一定會問，奪命大火發生後，當局唔係話會嚴打違規工廈嘅咩，因乜解究消防隱患依然遍地開花呢？鬼咩，當局話就話嚴打，實際上求其搵咗六幢存放危險品嘅工廈祭旗，其餘就關人個關。消防處更係一舊雲，連全港有幾多迷你倉都一味靠估，遑論其他違法經營嘅工廈單位。所以話啫，官僚靠得住，豬乸會上樹吖。
講起就火滾，前朝曾蔭權政府好大喜功，學人大搞活化工廈，但又冇監冇管，放任自流，結果工廈單位改裝成補習社有之、食肆有之、 Band房有之、宗教場所有之，只有諗唔到，沒有做唔到。現屆政府仲衰多兩錢重，對違規情況隻眼開隻眼閉不特止，又因為拓土建屋束手無策，搞到工廈劏房多如雨後春筍，大鑊爆完一隻又一隻，市民日日提心吊膽，你話無能港府係咪害人不淺吖？
香港自詡安全城市，事實恰好相反，唔係塌樓就塌招牌，唔係塌樹就塌天花，奪命火災仲長燒長有，簡直一步一驚心。發展局局長陳茂波話喎，計劃修例將經營工廈劏房刑事化，咁就講多無謂，行動最實際，千祈唔好講完就算，令兩位消防英雄犧牲得毫無價值呀。