政情：公民講場：訪港旅客下跌 蘇錦樑賴個天

本港遊客人數持續下跌，本月初嘅旅客人數亦呈現跌勢。商務及經濟發展局局長蘇錦樑（Greg蘇）尋日去廣州出席泛珠三角區域合作與發展論壇暨經貿洽談會前就話，上月訪港旅客數字已經回升咗喇，但八月份前半段就有下跌情況出現。咁點解會下跌呢？Greg蘇就話，因為八月份早段時間「天氣呀、打風呀」等因素，影響咗旅客來港嘅意欲喎。佢又叫大家要向前看，本港將有好多盛事陸續推出，佢對香港嘅吸引力係有信心。旅客人數下跌，Greg蘇責無旁貸，依家竟然賴個天，如果係咁就乜嘢盛事都唔使搞啦，等好天咪有旅客囉！