政情：丘文俊示威完先知老婆作動
沙田區議員丘文俊前日下午就沙田水泉澳邨街市商戶問題去咗請願，搞到連太太作動都唔知，最終要喺示威完結後先趕去醫院陪太太，BB直到尋日凌晨喺聯合醫院出世，重七磅幾。示威完喺產房陪伴太太嘅丘文俊話，全程都膽顫心驚，見到太太咁辛苦又咁偉大，佢真係「眼淚在心裏流」喎。佢仲話，其實太太前日凌晨都開始陣痛，但知佢要去請願，就忍到下午先入院，認真體貼。
囝囝改名參考武俠小說
丘文俊又話，佢幫個仔改咗個名叫「可樂仔」，係因為之前同街坊傾偈時覺得可樂係大家都鍾意、人見人愛。不過，囝囝嘅正式中英文名都未決定，丘文俊會刨武俠小說幫個仔改名，因為通常武俠小說都有好多人名，可以參考吓喎，但最緊要係老婆鍾意。被問到有冇上堂學點湊仔？佢就話之前冇時間上堂，但都有上YouTube睇片學餵奶、掃風同換尿片，希望可以搞得掂啦。