政情：葉劉退燒出院咳住去慶生宴
行政會議成員、新民黨主席葉劉淑儀（葉劉）尋日六十六歲生日，佢禮拜一因為發燒入院，到尋日下晝終於退燒出院，隨即出席傍晚舉行嘅私人生日宴會。不過，葉劉仍要戴住口罩，講嘢時仍不斷咳，仲話要食抗生素同唔可以講太耐。唔知生日會能唔能夠沖喜旺一旺，令佢盡快好番呢？
葉劉話，入院前相信已發燒兩、三日，但嗰陣仍未知自己發燒，淨係喉嚨痛同頭痛，之後搵胸肺科專家求診後，發現已燒至一百度，醫生建議佢即時入院四十八小時，於是放低手頭工作入院治療。直至尋日朝早檢查後，醫生認為佢已經退燒可以出院，但仍需食抗生素，亦建議佢多飲水同休息。
葉劉嘅囡囡葉榮欣（Cynthia）就全程幫手籌備生日會。Cynthia啱啱畢業回港，明顯清減唔少，佢話雖然未有正式磅過，但相信輕咗十磅以上，因為美國成日有沙律食。佢又透露已搵到工，預計十月正式返工，從事管理顧問。
葉劉為立法會香港島候選人，其他參選名單包括黃梓謙、劉嘉鴻、何秀蘭、張國鈞、詹培忠、鄭錦滿、羅冠聰、沈志超、王維基、徐子見、司馬文、許智峯、陳淑莊、郭偉強。