政情：區會老將架空立會新丁？
全港十八區區議會今年初選出三十六名正副主席，全部由建制派囊括，再加上新一屆立法會區議會（第一）功能界別議席由民建聯北區區議員劉國勳自動當選，本來「自己友」應該好辦事，但有傳地區人士質疑劉國勳呢個立法會新丁資歷淺，既唔夠牙力同政府爭取地區資源，又未夠斤両擺平地區山頭。此時突然傳出部分區議會「老鬼」計劃另闢渠道直接向政府最高層反映意見。若果成事，變相繞過劉國勳解決地區事務，建制派變成兩條腿走路，究竟是福是禍？
據聞區議會主席與副主席之間嘅關係近期出現微妙變化，有指上屆三十六名正副主席嘅WhatsApp群組已停用，有消息更指以人稱「福哥」嘅西貢區議會主席吳仕福為首嘅十八名區議會主席，另設WhatsApp群組作互通訊息之用，更計劃於日後建立渠道直接向政府最高層反映意見，且最快於下月聚會，呢個異動嘅客觀效果就係直通「天庭」，飛起十八名區議會副主席，同時亦有繞過劉國勳之嫌。
空穴來風，未必無因。地區人士分析，過去多區區議會主席有一定地位，隨住佢哋陸續由地區幕前退居幕後，加上今屆多區主席都係首次當選區議會主席，或由副主席「升呢」主席，佢哋同政府交手嘅經驗尚淺，因此必須有資歷更深嘅區議會主席去「擔頭」，除咗福哥之外，大埔區議會主席張學明及觀塘區議會主席陳振彬都相當資深。其次，全國人大委員長張德江喺五月訪港時，福哥同陳振彬亦係少有嘅地區代表獲邀出席，更顯出佢哋喺地區擔當重要角色。
質疑劉冇牙力同政府拗數
雖然劉國勳無驚無險進身立法會，但講到地位就同上一任不可同日而語，非一時三刻可以擺平地區山頭，而作為立法會新丁，上任後首要係熟習立法會運作，甚至要應付議會內嘅政治角力，想必要投放大量時間同心力，而佢嘅政治手腕及有冇牙力同政府拗數亦備受質疑。
對於係咪另設區議會主席WhatsApp群組互通訊息，以及另闢渠道向政府反映意見一事，尋日身在內蒙嘅福哥就簡單回覆話：「冇咁嘅事。」孰真孰假，大家拭目以待嘞！