中環出更：陳淨心復出率眾聲討漢奸黎
「愛港行動」召集人陳淨心沉寂咗一段長時間後，尋日終於再出動，拉隊去壹傳媒黎智英（漢奸黎）位於何文田嘅寓所外示威，炮轟漢奸黎黑金禍港。陳批評漢奸黎及其集團勾結外國反華勢力，以顛倒黑白、無中生有嘅手段喺香港不遺餘力咁從事反中亂港活動，喺違法佔領行動中又提供大量政治黑金搞亂香港，破壞香港經濟，應拘捕「佔中黑手黎智英」。
怒轟禍國害港
愛港行動卅五名成員下午帶同橫額及示威標語去漢奸黎寓所外示威，拉起兩張分別印有「反中亂港壹傳媒、黎智英滾出香港」及「拘捕佔中黑手黎智英、還我香港法治精神」字句嘅橫額，又舉起寫有「黎智英漢奸走狗」、「黎智英禍國害港」等字眼嘅紙牌，並高叫口號，部分人揮動五星旗同香港區旗。示威者逗留約一小時就和平散去，期間有警員到場登記部分示威人士嘅身份證。
近期針對漢奸黎嘅行動一浪接一浪，自六月十日起計，直至尋日到漢奸黎寓所及將軍澳壹傳媒大樓外抗議的行動最少達四十八次，當中自稱霸王國際集團員工及苦主嘅佔十次、正義聯盟佔三次，旅遊業界同其他人士則有三十五次。
卓妮