中環出更：荔園經典Game殺入廣州展銷會
每年年尾除咗特別多節日活動外，仲係唔少商戶最後衝刺嘅時刻，卓妮早前喺活動上見到香港工業總會主席鄭文聰及荔園主席邱達根，佢哋就話正準備於年尾橫跨聖誕節及新年檔期於內地廣州舉辦一個展銷嘉年華，將荔園呢個本地經典品牌連同其他品牌一同帶到內地，同香港工展會會期撞到應一應。
鄭文聰：邊玩邊買少有
鄭文聰話，展銷會不時都有，但連埋嘉年華一齊搞，可以一邊玩一邊買嘢就唔多，所以今次「品品2016粵港澳工貿推廣及展銷會暨嘉年華」就係其中之一喇！被問到會否與本港工展會撞期搶生意，佢就話兩者舉行地點唔同，今次主要希望將港澳品牌帶到內地，而佢哋仲諗住引進本地初創企業及年輕設計師參展，唔一定係賣成品，而係設計服務，因此同本港工展會性質不太相同。
同場仲有雅芳婷集團主席許章榮，講起早前有調查指內銷仍是趨勢，佢就話內地太大，宣傳無從入手，難得今次展銷會有多個大品牌聚集，顧客信心亦會大啲。今次會帶荔園經典遊戲殺入內地嘅邱達根話，年尾都希望搞搞新意思，計劃加入倒數等有氣氛嘅活動，但仍需視乎場地及設施是否容許，至於荔園嘅擲香口膠遊戲及吹氣設施就梗係唔少得，連鄭文聰都話自己細個成日擲香口膠！
卓妮