政情:借女車神邀功 波叔抽着火水

里約奧運香港時間今早閉幕,香港單車選手「牛下女車神」李慧詩(Sarah)雖然喺比賽中跌倒,與獎牌擦身而過,但仍贏得香港市民嘅尊重與認同。點知,發展局局長陳茂波(波叔)竟然發網誌抽水,藉Sarah出戰奧運一事,話當局希望為社會提供同體育相關嘅設施,並計劃推展一條貫穿新界東、西嘅單車徑。其實,單車徑計劃自○八年已開展,拖到今時今日都未完工已經好唔合理,波叔仲博大霧拎呢件事嚟邀功,跟住就畀環保團體鬧佢係樹木「屠夫」,簡直係抽水抽出禍。

波叔尋日發表嘅網誌提到,當局近年努力推動「新界單車徑網絡」工程項目,將現有分散嘅新界單車路段串連起來,提供一條貫通新界東西,全長八十二公里嘅單車徑。其中上水至馬鞍山段於前年已經開放,而屯門至元朗段預計喺今年年底完成,至於元朗至上水段工程就預期喺四年之後,即係二○二○年完成;而荃灣至屯門工程更加連預計完成日期都未有。至於近年愈來愈受歡迎嘅越野單車運動,佢就話依家正進行南大嶼山越野單車網絡擴建工程,可望明年底完工。

荃灣至屯門段被質疑爛尾

雖然波叔講到,希望盡快落實上述單車徑同越野單車徑項目,仲話想有更多好似單車手洪松蔭、黃金寶、李慧詩,以至同埋兩屆亞運越野單車賽獎牌得主陳振興等出色嘅運動員。不過,佢都係講多過做,事關翻查文件,其實「新界單車徑網絡」工程項目自○八年已經展開,原本仲計劃一二年完工,不過就因為地理環境問題而多次延後,依家荃灣至屯門工程都未開始,仲有人質疑會爛尾添!估唔到呢件延後同埋爛尾嘅工程,波叔不惜喺運動員身上抽水,變成佢所謂嘅「政績」。

話口未完,環保團體環保觸覺尋日就發信大鬧單車徑工程,單係元朗至上水段,已經要斬三千二百幾棵樹,覺得代價太大,更斥政府對提出嘅改良建議,好似減少單車徑寬度,同埋改良部分走線都一於少理,指成件事係「樹木大屠殺」。

爭議大 無共識 認叻攞嚟衰

講到尾,起單車徑爭議大、未有社會共識,而且遇到嘅地理環境問題都唔知可唔可以解決,波叔就搶住出嚟領功,點知仲挑起事端,反被環保團體鬧佢係樹木「屠夫」,呢次真係自己攞嚟衰喇!

第一手消息請下載on.cc東網iPhone/iPad/Android/Windows Phone Apps