俗語話「有錯要認，打就企定」，但睇吓班港產官僚，每次爆親大鑊，唔係「個別事件」就係賴「制度缺失」，總之千錯萬錯都唔係自己錯，有高官肯say句sorry，總算似番個人。問題係，市民眼睛雪亮，到底係亡羊補牢，堵塞漏洞抑或批評接受，態度照舊，呃唔到人嘅。
冇錯嘞，功夫茶講緊嘅咪係早排四十隻哮喘豬流入市面單醜聞囉。食環署及漁護處尋日公布相關調查報告，出事原因一如所料，屠場負責嘅員工接獲豬隻尿液測試初步結果有可疑嘅預警後，未向其他相關員工通報，加上屠房員工未接獲化驗報告符合要求前就開始屠宰，最終令哮喘豬肉賣通街。
至於公布零售點錯漏百出，食環署就解釋當日有兩個批次豬隻從涉事內地農場入口，其中一批驗出有哮喘豬，可惜批發商冇儲存完整資料，結果廿七間零售商中十六間被點錯相。雖然當局承諾按市價發放一次性特惠金，但有肉商已經講到明，商譽無端受損，條數認真襟計，唔排除繼續索償，睇嚟呢鑊嘢有排未收得科。
成件事清楚不過，由檢驗到通報到屠宰再到追蹤一條龍出錯，想賴都冇得賴，喺咁嘅情況下，食衞局局長高永文惟有死死地氣認錯，強調「毫無疑問政府要負上責任」，向市民及有關持份者致歉。不過佢老哥之後話鋒一轉，話內地經檢驗後，無發現豬隻有問題，唔排除運送途中畀人落藥，今次唔係單純嘅食物安全事件，又話已經向警方求助喎。
喂，呢啲咪跌落地揦番揸沙囉，其實講嚟講去，問題都係出在成個流程嘅第一步，如果確保所有豬隻都驗清驗楚至放行，莫講話落藥，即使落毒都唔會流出市面，官老爺想轉移視線唔該都搵個好啲嘅藉口吖。
點講都好，家陣最緊要係追究責任，防止事故重演。大家有眼見，無論南丫海難抑或鉛水風波，所謂事後檢討，次次都係「刑不上大夫」，今次睇怕都唔例外，當局話會對負責屠宰同檢疫嘅人員循公務員指引處理，亦即係話最多都係搵前線祭旗！當然喇，既然叫得檢討，梗唔少得改善現行機制，呢方面無非係加強溝通、培訓同演習一類嘅官話，恕功夫茶唔喺度多講，事關人嘅因素第一，制度再完善，執行者敷衍塞責都係嘥氣，呢幾年食安問題長爆長有，鑊鑊新鮮鑊鑊甘，就係明證。
始終都係嗰句︰聽其言，觀其行，市民願望其實好卑微，求其有餐安樂茶飯就心滿意足。官老爺如果以為賣吓口乖扮吓死狗，市民就會伸手不打笑臉人，咁就太傻太天真喇！