政情：馮程淑儀放大假唔投票
暑假即將完結，但由於新一屆立法會未開鑼，仲有唔少高官把握最後機會放大假充電。唔少司局長、副局長以至常任秘書長，近期輪流攞假，尋日憲報公布，早前捲入與富商換樓醜聞嘅民政事務局常任秘書長馮程淑儀，將於今日起休假，但九月會出席巴西殘疾人士奧運會，即係要飛越大西洋，搭廿幾個鐘飛機喇，直至下月中先返港，即係連立法會選舉都唔投票，唔知佢係咪想順便玩埋南美散吓心呢？
羅智光抖足一個月
憲報仲公布，食物及衞生局局長高永文都由明日起離港休假十日，唔知係咪因為處理完哮喘豬一事，可以去遠少少呢？至於常秘級，唔少公務員都積埋好多假，一放隨時可以放一個月，最近就有發展局常秘（規劃及地政）黃偉綸放咗兩個幾三個星期大假，保安局常秘羅智光更放足一個月假。尋日憲報除咗披露馮程淑儀放大假外，財經事務及庫務局常秘（庫務）謝曼怡亦於前日開始放大假，但就冇講幾時復工，唔通有排放？