政情：世界冠軍靠打機創錢途
最近好多人不分晝夜通街捉精靈，特別係年輕人，相信唔少家長都擔心，如果子女開學後繼續沉迷咁點算？曾奪打機世界冠軍嘅電子競技公司創辦人鍾培生（Derek）就話係好事，事關佢就係一路打機一路讀書，父母都冇特別擔心，只要打機唔影響讀書就冇問題，依家佢仲創出一盤市值「億億聲」嘅電競生意添！
王賢訊招攬鍾培生入仁濟
早前喺一個慈善活動上，我哋見到仁濟醫院副主席王賢訊（Vincent）同Derek好好傾，原來兩人都係美國大學校友。Vincent見Derek咁年輕有為，笑言要積極拉攏佢加入仁濟做善事，仲話Derek打機打出一片天，係年輕人嘅好榜樣。咁Vincent會唔會畀子女打機呢？佢就話：「邊有咁早呀？好遙遠喎！」皆因佢嘅大女就嚟五歲。點知Derek補充話，佢四歲就開始打機，Vincent聽完即笑稱：「輸咗！」認真搞笑。