政情：黃家和下月飛法唔投票
香港餐飲聯業協會會長黃家和（Simon）三年前喺法國波爾多毗連嘅貝爾熱拉克（Bergerac）購入一個年產兩萬支紅酒嘅小酒莊，今年佢買酒莊癮又起，再喺附近購入一個面積達一百四十公頃、約二十個維園面積咁大嘅新酒莊。Simon日前預告下月一日將會前往法國，肯定唔會喺九月四日立法會飲食界選舉中投票，笑言投唔投結果都係一樣喎！
Simon個新酒莊唔只地方大，仲附設二十七個洞嘅高爾夫球場、一間四星級酒店，以及一間米芝蓮星級餐廳，有好嘢食又有波打，難怪Simon一年至少飛三、四次過去，甚至連票都唔投喇！新酒莊第一批出產嘅約六百支紅酒會喺十月運返香港，Simon話大部分酒都作送禮自用，尤其係供應中華廠商聯合會活動，認真唔話得。