政情：梁敬國中大練水多阻滯
商務及經濟發展局副局長梁敬國（Godfrey）一向都鍾意做運動，踩單車又游水。由於佢係中文大學舊生，所以不時都會返母校游水。Godfrey喺fb上載咗多張相，話自六月尾以來未曾好好練水，於是喺里約奧運開幕後第二日諗住恢復鍛煉，點知中大泳池竟因緊急情況關閉，佢直言「萬事俱備、如箭在弦竟撻Q！情何以堪！」
Godfrey惟有返屋苑泳池游水，游咗三十個塘，但每個塘只係廿五公尺，夾埋游咗七百五十公尺，只需廿二分鐘就完成，仲游到冇心機，形容係「氹仔浸蛟龍」。佢上周日原本想再去中大游過，但到閘口時先至發現漏帶泳鏡，要揸車返屋企拎泳鏡，真係甩轆。最後佢去到中大泳池，以四十四分廿一秒游咗三十個塘，係首次以自由式喺四十五分鐘內游完一千五百公尺，總算有個交代喇！