中環出更：象哥當年揸步槍射雀
鍾意藝術嘅中華廠商聯合會（廠商會）會長李秀恒，早前喺旗下葵涌活化工廈KC100大堂展廳舉行油畫展，由好友兼「一畫廊」創辦人方毓仁展出十幾張當代人物畫家沈漢武嘅作品，重現半世紀前文化大革命時期嘅人物風情。進出口界立法會議員黃定光（象哥）見到其中一幅揸住步槍嘅女學生油畫就好大感觸，事關佢當年都揸過呢把步槍喎！
象哥話，當年佢喺香港讀完中學打算返廣州讀中山大學，但考唔到就插班讀高三，點知趕上呢個狂熱嘅歷史時刻，結果讀唔成書。講起呢把半自動步槍，佢如數家珍話，呢支國產步槍叫做「五六式半自動步槍」，後來蘇聯研製嘅AK-47自動步槍引入中國，就叫做「五六式自動步槍」，兩者分別係半自動步槍嘅子彈只可單發，全自動步槍就可以連發。咁佢揸步槍用來射乜呢？佢停咗幾秒欲言又止，笑稱用來射雀仔喎！
史立德吳國安忙到心痛
方毓仁當年亦跟隨父親返內地，結果文革喺佢生命中留下不可磨滅嘅印記，講起呢段歷史，講幾日都講唔晒，難怪佢對沈漢武嘅油畫咁感觸。而李秀恒就以投資心態買入幾幅畫，當日亦展出其三幅珍藏。
卓妮現場見廠商會副會長史立德及會董吳國安（安哥）傾得好肉緊，原來安哥早前突然心痛，入院檢查後好彩無事，醫生話可能係工作壓力大。史立德聽完即刻話最近都試過心痛，但工作太忙，唔得閒去做檢查，而對上一次檢查已經係六、七年前喇！
卓妮