唐伯虎曾有詩云︰「琴棋書畫詩酒花，當年件件不離它。而今般般皆交付，柴米油鹽醬醋茶。」講嘅係才子為生活所迫嗰份無奈。雖然香港人唔使憂柴憂米，但一樣要為開門七件事閉翳，事關家陣無食不毒，連醬油都唔例外，一個唔好彩容乜易病從口入o架！
尋日功夫茶至講完，港產官僚把關不力，以致食安危機長爆長有，估唔到好嘅唔靈醜嘅靈，消委會最近測試市面四十款常見豉油、醬油同埋鮮露，發現十一款含有可能令人類致癌嘅4-甲基咪唑，其中含量最高嘅兩款，只要分別服用兩毫升及七毫升，已經超過美國加州嘅參考指標；另一款生抽皇仲誇張，每毫升含一千三百萬個菌落，遠超內地標準上限，加上有醬油鈉以及味精含量偏高，總之就問題多多，防不勝防係啦。
嗱，咪以為小事吖。4-甲基咪唑除咗可令老鼠患癌，更被世衞轄下研究機構列為可能令人類致癌嘅物質。大家可能會問，既然呢啲醬油可能食壞人，點解仲可以賣通街呢？鬼咩，人哋內地同台灣都有制訂相關標準，加州更規定如生產或銷售嘅產品令人每日攝取高過一定上限，必須喺產品包裝上加上警告字句，唯獨香港完全無王管，消費者選購醬油時想食得健康，惟有自己查番食品標籤以及相關嘅識別編號。講真，呢啲編號名單水蛇春咁長，專家都隨時考起啦，更何況一般市民，食安官僚闊佬懶理，關人個關，簡直靠害。
冇計喇，香港食安標準出名落後，有時甚至連第三世界都不如，致癌醬油只係冰山一角咋。好似香港人最鍾意食嘅火鍋咁，查實好多現成湯包鈉含量遠超世衞標準，長期食用分分鐘導致高血壓甚至腎病。仲有反式脂肪，早就被公認係血管硬化以及中風等嘅元兇，美國已經計劃全面禁用，而香港就零監管，問你怕未！
唔怪得港產官僚成日被人話好似四方木咁，唔踢唔郁喇。鉛水危機除咗令市民談重金屬色變，亦揭發本港針對食物重金屬含量嘅法例三十幾年如一日，比國際標準寬鬆幾十倍，官老爺唔係亡羊補牢，堵塞漏洞，反而藉口多多，拖得就拖，連修例時間表都冇。急驚風遇着慢郎中，唔出事至奇喇。
講到呢度，功夫茶不期然諗起一單新聞。有「印度鐵娘子」之稱嘅人權分子沙爾米拉，日前結束為期十六年、亦係史上最長嘅絕食抗議行動。香港地豬肉又話有哮喘藥，牛肉又話有防腐劑，家陣連醬油都話有致癌物，市民反正冇啖好食，不如向呢位女鬥士學番兩招好過！