紀律部隊無紀律，香港未來，梗係大鑊喇！大家都睇到，冇神經政府帶領嘅部門，全都成了冇靈魂嘅失魂魚，政策固然推出一項跪低一項，其餘應嚴厲執法嘅又拖拖拉拉。此外，國民教育輕易被扳倒，如今乜鬼「民族黨」、「本土關注組」又要把港獨思潮帶入中學校園。
香港校董學會日前發表聲明，反對教育工作者在學校散播港獨思想，聲明特別要求教育局對違反職責、操守及條例的教育工作者予以嚴格執法。一睇見「嚴格執法」，真係火都嚟埋！廢柴高官一係死唔認錯，一係無視紀律，任由禮崩樂壞，特權特辦有之，能力不逮亂噏廿四者有之……
吳得掂局長，香港未來仍然是一塊福地，抑或會陷入百年難遇嘅亂局，真係靠晒你呢個愛讀書嘅高官把關喇，一錯不能再錯，若任由港獨思想植根中學校園，未來香港將湧現「革命烈士」，那實在太沉重了。重整香港校園文化，讓中學成為培養德智體群美的愉快校園，這小小的要求，吳局長，希望你努力為之，希望你鐵肩擔道義，強臂挽危局！
教育之事，任重道遠，吳得掂局長假假哋都係讀書人，冇理由唔知紀律嘅重要性，晚清名臣曾國藩說過：「吾輩所最宜畏人敬慎者，第一則以方寸為嚴師，其次則左右近習之人，又其次乃畏清議。」曾國藩覺得要敬畏謹慎的，其實就是對自己內心世界要重視，其次是左右經常接觸的人，再其次則是畏懼清議。今次係吳得掂重拾形象的大好時機，畏懼清議，理應撥亂反正，知道紀律嘅重要，更加要拔劍而起，雖千萬人吾往矣。老朽多麼希望你做齣好戲，唔好畀人睇死乜都要奶媽傍住，老朽雖然做了教育界逃兵，對你仍有「哀其不幸，怒其不爭」的情意結。為了不讓香港步入「烈士焚城」亂局，吳局長暫不宜外遊，也不必到外地考察，關注港獨毒港才是正務，出手吧！