政情：八網難逃：困教大廁格 張潤衡搵救兵
大家有冇試過被困廁格？青年事務委員會委員張潤衡尋日就喺教育大學中伏嘞，惟有致電保安嚟「營救」。慶幸佢有帶電話入洗手間之餘，亦冇發生「跌電話」嘅情況，否則佢都唔知點求救呀！
張潤衡尋日喺社交網站facebook上發貼，仲貼咗張自己同廁格門嘅相片，指教大內嘅B3P層男廁中間廁格門壞咗，導致佢被困。佢自言好彩有電話喺身，可以致電保安求救，同時亦向前來營救嘅保安致謝，佢又話當保安詢問「係唔係有學生困咗喺度呀？」時，係佢聽過最好聽嘅說話。之不過，佢嘅貼文中有一句「為何發生在我身上的逆境總在廁所裏？」莫非佢已有多次被困廁格嘅經驗？
點解佢會喺教大呢？事關佢依家係教大嘅生命與價值教育博士研究生，亦喺舊年獲教大委任為宗教教育及心靈教育中心榮譽顧問，難怪佢會喺教大出現。不過，下次佢記得檢查清楚廁格門，避免事件重演。