政情：評價別人 楊大偉睇品德
知識與品德係教育兩大基石，早前一班有心人成立咗一個「香港品格日協會」並於九月二十二日舉辦「香港品格日」，又拍咗幾條短片宣揚品格嘅重要，其中社企Green Monday聯合創辦人楊大偉（David）認為，今時今日知識同資訊喺網上太容易搵到，品德先係評價一個人靠唔靠得住嘅因素，好似信用、上進心同責任感等等。
學識感恩 同樣重要
David又話唔同嘅品德素養需要互相配合，係一個整體概念，冇話邊樣最重要，等如一個人如果唔守信用，就算佢有上進心都係唔得。而學識感恩亦好重要，佢就好感恩父親帶佢認識佛學，當生活遇到煩惱同唔開心時，可以用唔同嘅論點重新睇件事，而素食亦係因為父親而令佢開始接觸嘅。
電影《五個小孩的校長》嘅真人主角校長呂麗紅就認為，雖然大家都有智能電話，但唔係咁就擁有一切，有電話都要有人答覆先得，始終要同人溝通，而佢覺得一個人有禮貌、友愛、肯幫助別人，就自然會受人喜歡。