政情：候選人甩轆 有眼不識高官
立法會選舉一批候選人集體甩轆，對中港官場嘅高層官員竟然「十問九唔知」！話說有電台尋日舉行九龍西直選選舉論壇，民建聯蔣麗芸分別問及公民黨毛孟靜、民主黨黃碧雲及西九新動力梁美芬，係咪知悉財經事務及庫務局副局長、創新及科技局副局長，以及勞工及福利局副局長嘅名，最終三人都被考起，無人答得出，其實真正答案順序係劉怡翔、鍾偉強及蕭偉強。
嗌錯對手名 蝦碌尷尬
除此以外，有部分九西候選人連點對手個名都蝦碌，或出現張冠李戴嘅情況，例如蔣麗芸將排喺「熱普城」黃毓民名單第二嘅馬愉生，錯認係另一候選人社民連吳文遠，令吳一度呼冤說「唔係我呀」，蔣麗芸隨即面露尷尬表情，但最終都係講唔出馬愉生嘅名；同樣地，維園衝鋒朱韶洪發言時亦一度忘記民協譚國僑嘅名，莫非唔認得對手嘅現象係會「傳染」？
除咗甩轆講唔出香港多個政策局副局長嘅名，有三名港島候選人喺有相提示嘅情況下，辨認七名中央政治局常委亦存在困難，其中工聯會郭偉強只辨認到國家主席習近平及全國人大委員長張德江兩人，並一度成功辨認國務院總理李克強，但不消一會就猶豫改口稱「唔係呢個，要搞清楚先」；郭其後又指住中紀委書記王岐山嘅照片，錯稱對方姓吳，並喺最後總結發言時一錯再錯，將中央政治局常委講錯為「政治委員會」嘅領導人，惹來網民連番揶揄係咪愛國。
同區另一名候選人司馬文，同郭偉強一樣只係認得兩名中央政治局常委，佢事後坦承，身為香港立法會議員認識中央領導人很重要，並同佢哋建立工作關係。
蔣麗芸等人已報名參選九龍西直選，同區其他候選人有何志光、林依麗、關新偉、劉小麗、游蕙禎、李泳漢及狄志遠；郭偉強等人已報名參選港島區直選，同區其他候選人有黃梓謙、劉嘉鴻、葉劉淑儀、何秀蘭、張國鈞、詹培忠、鄭錦滿、羅冠聰、沈志超、王維基、徐子見、許智峯及陳淑莊。