中環出更：防範家傭收毒郵包 龐愛蘭靠嚇
最近有不法之徒利誘家傭用僱主地址代收毒品郵包，新嘅犯罪手法隨時陷本港數十萬僱主於不義。早前卓妮喺一個活動上，同維多利亞教育機構總校長孔美琪（Maggie）及區議員龐愛蘭（Scarlett）講起呢個話題，Scarlett聽完直呼好得人驚，話返屋企第一時間要告誡家傭千祈咪亂嚟，否則可能要坐監，返唔到鄉下。Maggie就好淡定，事關家傭已喺佢屋企做咗二、三十年，相信工人唔會咁蠢喎。
由紫荊青年商會舉辦嘅「同心圓表彰計劃」日前舉行頒獎典禮，計劃旨在推動職業女性喺家庭、事業同個人專長各方面平衡發展，尤其係鼓勵僱主及社會制訂相應措施，令婦女走出家庭無後顧之憂。Scarlett同Maggie都係家庭、事業兼顧嘅榜樣，梗係鼎力支持，仲幫手做埋評判。
關德仁信工人唔會以身試法
不過婦女投身職場之後，免不了要請傭人打理家頭細務。若果家傭被毒品拆家睇中，僱主就真係欲哭無淚嘞！身兼國際戒毒基金會主席嘅Scarlett話，不法之徒用金錢利誘，可能都吸引到一啲傭工收郵包，呢啲新手法值得關注。屋企都有請工人嘅國際青年商會香港總會會長關德仁就話，只要僱主對家傭好啲，相信工人都唔會以身試法嘅。
講番「同心圓表彰計劃」，紫荊青年商會會長黃濤話，計劃話咁快已進入第三屆，希望日後可以薪火相傳繼續做落去，以釋放更多女性勞動力投入職場，助婦女搵到平衡嘅人生。
卓妮