政情：沈祖堯為着新泳褲減肥
之前同大家講過，中大校長沈祖堯近排清減唔少，佢尋日下晝出席一個全港大學賽艇錦標賽時，自爆減肥皆因早前畀太太嘲笑新買嘅泳褲唔啱着，於是許下一年內要着得落嘅目標，點知努力做運動加埋節食之下，一個月已經着得落嘞，依家仲綽綽有餘，連西裝都要重新添置。
講到划艇，佢話讀書時冇玩過，因為太貴玩唔起，相比之下獨木舟就較便宜，所以有玩過。但講到中學時佢最熱愛嘅運動就係打羽毛球，仲加入過校隊，記得當時教練頗嚴謹，放小息都會練習，自覺都幾辛苦o架！佢又大呻當年跟身高分組，由於佢中一、二時嘅身形已比較高，感覺好似較蝕底。
呢排奧運氣氛高漲，佢都話有睇奧運賽事，仲話最鍾意睇游水，但佢笑言唔會捱夜，所以只係睇重播咋！