潮流興講集體回憶，最近有位八十後出書介紹各區傳統街市，話貪佢夠晒「貼地」兼有人情味，唔似得大型連鎖超市咁硬梆梆喎。之不過咁，家陣傳統街市買少見少，想體驗呢份「集體回憶」，真係有買趁手喇！
呢，好似天水圍咁吖，天耀街市今年初結業之後，由領展管理嘅天慈商場亦跟手於本月底關閉裝修，有團體調查發現，超過七成街坊唔知道商場裝修，六成人更表示生活因此大受影響。咁又難怪嘅，天慈邨街坊今後要行二十分鐘到鄰近街市買餸，你知喇，天時暑熱，好人好姐都隨時中暑暈低，更何況公公婆婆，你話唔㷫就假。
天水圍街坊買餸唔單止山長水遠，仲要被迫捱貴餸，特別係天耀街市摺埋之後，淨係買條紅衫魚，隔籬屋苑都貴成倍，問你點頂。冇錯，屋苑商場有冷氣兼夾裝修企理，但正如有街坊話齋，一入門口見到賣長腳蟹同和牛，當堂嚇到走夾唔抖，寧願跨區到元朗買餸。講開又講，天水圍本身已經夠隔涉，公共設施又嚴重不足，家陣連食都冇啖好食，唔怪得畀人叫「悲情城市」喇。
所以話，領展翻新屋邨商場，希望靠升呢吸引多啲人流，你唔可以話佢唔正路，但好明顯「堅離地」囉。之前就有團體調查發現，領展旗下十二個商場及街市出現空置情況，當中最高空置率甚至達到七成，查實呢類商場好多都係自成一國，主要服務當區基層市民，就算裝修到好似王宮咁，都冇可能吸引其他區嘅人光顧，與其愈裝修愈拍烏蠅，形成惡性循環，不如減租益吓商戶，一來可以薄利多銷，二來可以搞旺個場，一家便宜兩家着，何樂而不為？
點講都好喇，領展同港鐵一樣，作為上市公司，追求最大利潤就梗㗎喇，同佢哋講社會責任等於對牛彈琴，你有你鬧「賺到盡」同埋「霸權」，佢有佢(才窊)銀至上。千錯萬錯，都係錯在港府當初容許領匯上市，口口聲聲話會保障市民利益，之後拍拍籮柚，一句「小政府，大市場」就關人個關，任由領展巧取豪奪。講真，保障市民利益，辦法唔係冇，爭在官老爺有冇心肝嘅啫。有團體建議當局按人口比例興建中央街市，又或者將新落成及承租合約屆滿嘅屋邨街市，收番嚟畀房署自行營運，港府收到未吖？
難為高官好意思將領展同港鐵、強積金對沖機制並列為香港嘅「三座大山」，仲牙斬斬話要着手「移山」添。計功夫茶話齋，今屆政府施政混亂，民望低殘，本身正正係阻住地球轉嘅「大山」，仲話想學人做「愚公」，你話係咪笑大人個口吖！