公屋輪候時間愈來愈長，一般公屋申請平均輪候時間長達四點一年，進一步拋離三年配屋嘅政策目標。不過，房屋委員會資助房屋小組委員會主席黃遠輝尋日警告，總體輪候情況會繼續惡化，要四至五年後先可縮短輪候時間，講明短期內無法加快公屋供應。公屋供應不足，但另一邊廂發展局局長陳茂波就多次重申未來幾年私人住宅單位潛在供應量有九萬幾個，供應充足，仲話唔會停止搵地起私樓添！地就係得咁多，政府顧得私樓供應，又點樣同時增加公屋供應呢？
