政情：今日你上鏡：「龐」大夢想 城門河變鴨川

沙田區議員龐愛蘭（Scarlett）一向勤力，好似之前城門河出現大批死魚，佢就第一時間向當局報告，好快就處理咗件事。點知Scarlett連去旅行都不忘區議會工作，近日佢去日本京都旅行，除咗身穿和服暢遊清水寺外，去到鴨川觀光時，就話希望火炭未來可以有類似鴨川嘅環境，河邊有小商販，可以畀遊客幫襯。雖然Scarlett想將城門河變成鴨川似乎有啲難度，但佢嘅志氣同努力認真抵讚，似足工聯會立法會議員陳婉嫻多年前提議將啟德明渠打造成南韓首爾清溪川，所以話只要有夢想，終有一日會成功嘅！