政情：旅行社招聘日 惹來市民報平價團
旅遊業議會尋日喺油塘舉辦旅行社招聘日，有十九間旅行社參展，提供多個職位空缺，包括文職、導遊、客戶服務員及車長等，希望協助業界吸納新血。旅議會主席黃進達及總幹事董耀中到場主持開幕，又巡視各攤位並與參展商打招呼。
黃進達現身撐場仍冷清
雖然兩大巨頭現身撐場，但無助搞旺個場，人流不多，場面冷清。招聘日之所以咁冷清，懷疑同宣傳不足有關，事關活動位處嘅商場，只有一處見到宣傳海報，而招聘會又無詳盡嘅招聘工作及待遇列表，市民只能逐間旅行社去問詳情。至於旅議會有冇喺其他渠道宣傳今次招聘日，咁就唔知喇。
招聘日除咗冷清，最搞笑係有市民誤會以為個招聘會係旅行社展覽，一心嚟到以為有平價旅行團報名，一問之下先知原來係招聘會，空歡喜一場，大嘆無奈，或者旅議會搞旅遊展可能仲有生意做吓。睇嚟下次旅議會再搞招聘日，要做好啲宣傳先得喇。