政情：梁金成漏報區選開支 廉署搵上門
原本出選立法會新界東選區排名單首位嘅陳國強，被選舉主任裁定提名無效，最後由同一名單、網名「金金大師」嘅梁金成頂上。不過，梁金成尋日凌晨一點半喺社交網站facebook發文話畀廉政公署搵上門，唔通政府對港獨派又有新動作？抑或唔知佢衰咗啲乜嘢呢？
涉款廿幾蚊 理虧仲怪人
梁金成解釋，原來廉署搵佢係因為去年底參選區議會選舉時，漏報咗部分選舉物品開支，提醒佢要向選舉管理委員會補番申報，所以係完全唔關今次立法會選舉事，虛驚一場。而佢漏報嘅選舉物品，只係義工證，涉及款項只係二十幾蚊，佢質疑政府係咪需要動用廉署向佢作出「溫馨提示」。不過，漏報就係漏報，點怪得人呢？
今屆立法會新界東選區候選名單仲有方國珊、林卓廷、廖添誠、陳云根、梁國雄、張超雄、楊岳橋、麥嘉晉、鄭家富、葛珮帆、侯志強、李梓敬、鄧家彪、范國威、陳玉娥、黃琛喻、李偲嫣、陳志全、梁頌恆、容海恩及陳克勤。