政情：不甘寂寞 民主阿婆 濫炒議題
每逢香港有大事發生，「搞事四人幫」成員之一、政治能量微乎其微嘅前政務司司長陳方安生（民主阿婆）必定不甘寂寞、多多動作。立法會換屆選舉將於下月舉行，民主阿婆就一如所料有新搞作，今次佢就牽頭大搞論壇，題目仲要係「誰帶頭摧毀廉署和法治？」，不但炒熱呢個敏感議題，發表偉論時仲講到離晒題，說三道四，除咗企圖幫自己呢塊舊電池充電外，話唔係幫泛民主派製造立法會選舉彈藥都冇人信啦！
今次論壇由民主阿婆擔任召集人嘅智庫，以及佢創辦兼任董事嘅基金所合辦，論壇邀請咗前廉政專員施百偉、公務員事務局前局長王永平等人擔任講者。民主阿婆一開波就話香港過去一年發生多宗違反《基本法》及「一國兩制」嘅事件，包括香港大學副校長任命風波中，院校自主及學術自由受到干預。之後佢又點評政府喺銅鑼灣書店事件嘅表現懦弱，仲話近年警隊及律政司屬下嘅刑事檢控部門都變得政治化添！
借港獨參選風波抽水
至於近期鬧得滿城風雨嘅港獨人士參選立法會資格風波，民主阿婆當然唔會放過抽水機會啦。佢話一位「有抱負嘅年輕人」被剝奪參選資格，質疑選舉主任並冇法律賦予嘅權力作出呢種政治裁決，更批評政府漠視合法程序，並且篡奪法庭權力。而論壇後，她亦繼續炒作，表示對律政司司長袁國強感到遺憾，認為袁嘅首要工作係捍衞法治，但喺今次事件中就帶頭破壞，擔心會令香港變成人治。
李漢奸台下發言配合
民主阿婆喺台上炒作，同為「搞事四人幫」一分子嘅民主黨創黨主席李柱銘（李漢奸）就喺台下配合，把握機會發表偉論，形容廉署係「I can't arrest CY（我不能拘捕特首梁振英）」，更大嘆修改法例都無用，因為現時係委任廉政專員出問題，認為要有真普選先可以真正解決問題，似乎亦係偏離主題。民主阿婆忽然搞論壇，相信有意將近期具爭議性議題炒熱，幫泛民主派製造立法會選舉彈藥，攻擊政府。
相對離題萬丈嘅民主阿婆，其他講者就非常貼題，好似王永平就針對廉署人事任命，帶出李寶蘭被取消署任執行處首長事件中嘅疑點。至於施百偉就講述廉署嘅演變，談及近期廉署風波時就以長時間唔喺香港拒絕作答，說話非常小心謹慎。施百偉喺論壇後仲話，李寶蘭被取消署任並非不尋常，為咗方便行政，署任時間可以好長，而佢亦曾署任法律專員超過一年，但最終亦冇正式就任，所以認為廉政專員白韞六喺事件上毋須下台。