中環出更：開會瞌眼瞓 象哥歸咎泛民
喺無對手下自動當選連任嘅進出口界立法會議員黃定光（象哥），尋日接受電台訪問回顧上屆議會工作，以及展望新一屆立法會議員嘅素質。身為建制派一員，象哥當然大力批評泛民主派議員拉布及只顧政治爭拗，浪費晒議會嘅時間同納稅人金錢，希望市民眼睛係雪亮嘅，會喺嚟緊選舉選出能夠為香港樹立良好形象嘅議員喎。
不過，講到浪費時間同影響形象，象哥亦出晒名經常喺開會期間瞌眼瞓，堪稱「立法會睡婆婆」，同泛民表現比較只係五十步笑百步。被問及有關問題時，象哥又係歸咎泛民成日響鐘拉布，將佢「綁架喺個座位度」，加上其他議會工作繁重，佢先會偶爾頂唔住瞌吓。
講邊境購物城轉口風
象哥喺上屆會期一直推動興建邊境購物城，希望將旅客分流以紓緩港九購物區嘅擠迫情況，但搞咗年幾兩年、到依家訪港旅客大減都未建成。不過，象哥尋日又有新講法，話香港經濟需要多元發展，邊境購物城亦要改變方針，唔單止服務內地旅客，亦要吸引到本地市民。講到咁，莫非購物城計劃又要押後？
卓妮