中環出更：投資眼光準 林華琴：落決定勿拖拉
投資講求眼光，在危機降臨前夕識得果斷斬纜嘅高手始終唔多。港澳台灣慈善基金會（基金會）前日舉行晚宴，歡迎一班來自台灣嘅嘉賓，卓妮見到港澳台灣同鄉會會長林華琴（Judy）及香港文化交流基金會主席江素惠傾得好肉緊，原來兩人交流緊投資心得。Judy成功避過呢一波人民幣貶值及○八年金融海嘯，難怪江素惠讚佢眼光好精準。
Judy話，去年七月佢的起心肝賣晒人民幣，已經輸咗幾十萬元，點知依家人民幣愈跌愈有，真係輸少當贏。至於○八年金融海嘯來襲前夕，佢毅然決定全面沽清股票，將資金用嚟買樓，結果唔使多講都知賺到笑啦！Judy話，佢做投資決定時唔會拖拖拉拉，係幸運避過危機嘅原因。
許漢忠與飛機有緣
同場仲有基金會主席張佐民、前主席錢立祐、台北經濟文化辦事處處長嚴重光等人。身兼基金會永遠榮譽顧問嘅民政事務局前局長藍鴻震（藍爺）都喺度，最近有航空公司趁暑假開辦花蓮至香港嘅直航包機，藍爺同太太及朋友相約到花蓮、台東玩咗五日，慳番唔少由桃園國際機場轉車嘅時間。藍爺話，當地一片青山綠水，人口唔多，期間見到好多奇珍異獸，相信被石屎森林包圍嘅香港人會好鍾意。
「台灣女婿」新創建副行政總裁許漢忠及太太楊少宜都有到場，許漢忠做過航空公司高層及機場管理局行政總裁，依家咁啱負責睇住嘅範疇包括飛機租賃，睇嚟佢同飛機真係好有緣。
卓妮