有個笑話係咁嘅，有位司機大佬帶寵物龜返屋企，撞正大塞車，烏龜唔耐煩，決定走返屋企，點知隔咗好耐之後折返，原來主人唔記得畀鎖匙佢。香港地塞車情況雖然冇咁誇張，但講到輪候公屋咯喎，直頭慢過烏龜，少啲耐性都唔掂。
唔係講笑(o架)。房委會最新數字顯示，直至六月底公屋輪候冊上有廿八萬八千三百宗申請，較三個月前多三千五百宗，而平均輪候時間就由三點九年增加到四點一年，再次證實三年上樓嘅承諾已經彈票，亦係對解決房屋問題嘅施政「重中之重」莫大諷刺。
港產官僚冇嘢叻，最叻就係篤數粉飾太平，上樓平均輪候時間正正係典型例子。之前房屋署就被踢爆將長者優先及凶宅特快配屋計入平均輪候時間，甚至將簽咗上樓意向書但等緊入伙嘅準住戶計算在內，可見四點一年上樓呢個數字，根本反映唔到問題嚴重性。
好似有位住深水埗劏房嘅女士咁吖，輪咗超過六年，四年內被加租超過一倍，兩母子被迫繼續屈喺五十平方呎嘅蝸居；有劏房戶雖然連公屋凶宅都唔放過，但最終都因為太搶手失望而回，都咪話唔淒涼。呢啲個案只係冰山一角，家陣有逾六成嘅三人家庭輪候市區公屋長達四至五年，七成半四人家庭更要等超過五年添！
最令人擔心嘅係，公屋需求不斷增加，供應遠遠追唔上，僧多粥少只會愈來愈嚴重。港府之前公布十年建屋大計，聲稱興建二十九萬個公營房屋，點知又係吹水唔抹嘴，預計未來十年只能提供廿五萬五千個單位，足足差成大截，有立法會議員擔心出年平均上樓時間延長到五年，唔係杞人憂天。
面對上樓難問題，官老爺例牌又係姓賴，話覓地建屋需時，個別項目進度受控制能力以外嘅因素影響喎。嘥氣喇，新加坡同香港一樣地少人多，而且佢哋嘅組屋當年都係向香港取經，發展到今時今日，已經為超過八成民眾提供安居之所，與其話覓地建屋阻力太大，不如話港產官僚能力太廢！
香港就係咁嘅喇，基層望樓興嘆，連豬欄雞棚改建嘅劏房都有價有市，反觀高官權貴，住大屋養番狗唔在講，連霸官地僭建都冇人理。最離譜嘅係，之前有高官居然大發公屋荒財，經營劏房賺到盆滿缽滿，一面係富人天堂，一面係窮人地獄，試問天理何在？
始終都係古人講得啱︰民不服吾能而服吾公。港產官僚得過且過，胡混度日，施政本來已經一塌糊塗，再加上窮人富人兩套標準，不公不義，民怨唔爆煲至奇！