年輕人參政，選區議員又好，選立法會議員也罷，若然眼裏只有高薪厚酬而目中無市民，咁都選上，老朽只能怪責選民有眼無珠。立法會淪為垃圾會，比例代表制令當選者的門檻愈來愈低，激進分子抬頭，像新界東補選時獲六萬多票的本土民主前線成員梁天琦，便雄心勃勃的要進身議會，做其月入近十萬元嘅「尊貴議員」，可惜一紙「確認書」成攔路虎，搞到佢怒火中燒，要化身「革命」烈士。
梁天琦被六萬多票沖昏頭腦，加上爛果報三日一小吹、六日一大捧，一如捧黃衞兵咁，令其變成「思想家」、「風雲人物」，如今又要令梁天琦變成「無敵王者」，殊途同歸的「要他滅亡，必先令他瘋狂」，於是梁天琦大言炎炎以為自己就是王者，彷彿口氣不大就不能彰顯其「英雄本色」 ，可惜佢就係少咗嗰種青筋暴現、力竭聲嘶嘅「勢」，倒是還有幾分寸嘴，聲稱「搶我一席，贏番三席」。
梁天琦絕對係令人刮目相看嘅「廢青」，廢得嚟也許是「菊殘猶有傲霜枝」，其實講乜鬼「搶一席贏三席」吖，講嚟講去，都係諗住去搶立法會嘅資源。佢都好務實，知道搞乜都好，冇錢不行，坦承立法會呢個平台，是一場政治資源爭奪戰，指每名議員四年任期共逾千萬元資源，唔去爭，就眼白白益咗其他佢唔認同嘅政黨。
其實大部分市民都應該明白佢搞緊嘅係「搵銀革命」，有錢再來玩「本土」搞「港毒」，憑呢種心態來玩孫中山先生所說的「政治就是管理眾人之事」？阿哥，做代議士不關心香港民生，不詰問廢柴高官何以膽自大一味卸責，而只顧及爭奪資源畀自己搞事，令香港進一步撕裂，施政更加空轉，敢問憑如此胸襟識見，戇血上腦一味為自己着想，心中無民，還搞甚麼政治？即使真的做咗代議士，你話佢會帶給香港乜嘢美好明天？想一想都心寒！