政情：楊潤雄邊沖奶茶邊「宣教」
沖奶茶同教育有乜關係？教育局副局長楊潤雄（Kevin）尋日親身示範，佢出席由香港咖啡紅茶協會主辦嘅「國際金茶王大賽」香港區決賽，除咗做嘉賓評判外，仲乘機宣傳「行行出狀元」，沖奶茶都可以沖出冠軍。
處男登場 試沖幾杯
Kevin話佢同協會主席黃家和識咗好耐，對方早前搵佢做嘉賓，佢認為奶茶已列入聯合國非物質文化遺產，算係代表港式文化，加上可宣傳「行行出狀元」，就算讀書成績唔理想，都可以有一門手藝，仲有機會成為冠軍添！
講番奶茶，Kevin話以前都有飲開，但依家就飲少咗喇，尤其下晝一飲就怕夜晚瞓唔着，所以最多食早餐飲番杯。至於點為之好嘅奶茶，佢就話獨立飲一杯未必試得出好唔好，做評判就會試得出邊杯較滑、邊杯較香。佢尋日都「處男登場」，試沖咗幾杯奶茶，但師傅一早調校好茶葉，佢只需將水倒落去就得，但都係睇就容易，沖得好都有難度。