政情：做立會主席？梁君彥十五十六
自動當選成為立法會工業界議員嘅梁君彥被指係下屆立法會主席人選，佢尋日接受電台訪問時竟然話自己年紀大，希望多啲時間享受人生，陪吓屋企人咁，目前會專心幫黨友助選，未有認真考慮做唔做主席喎。不過，之後又補充，話如果可以修補行政與立法關係，又會考慮競逐主席之位。之前明明傳出梁君彥為咗主席之位同其他建制派爭崩頭，依家又講到好似唔想做咁，莫非形勢逆轉，打定輸數？
梁君彥提到立法會主席嘅工作時，話泛民主派經常反對政府提案，作為立法會主席唔一定要用強硬作風面對，反而要同泛民議員及政府溝通，搵方法解決。佢話，今屆最後一個立法年度，由於無泛民議員可出任內務委員會副主席，所以佢作為內委會主席，都成日同泛民核心領導溝通。
不過，講到自己好似不二之選嘅梁君彥，之後又話年紀大，希望多啲時間享受人生，陪吓屋企人，目前會專心幫黨友助下選。講到自己自動當選，佢就話反映業界支持，但都希望培訓新人接棒喎。