政情：城大塌頂 胡曉明牽頭改建
城市大學康樂樓內嘅胡法光運動中心綠化植被屋頂倒塌事件，屋宇署公布初步調查報告列出多個可能導致屋頂倒塌嘅原因，當中逾半涉及原有屋頂嘅設計缺憾及用料問題。而城大相關委員會亦在調查事件中，雖然未知邊個要為事件負責任，但對城大學生嚟講，其中一個最切身嘅問題就係運動中心停用喇！不過，城大校董會主席胡曉明透露，打算再捐錢牽頭改建運動中心。
料需數億元 冀下年動工
胡法光運動中心呢個命名，正正反映出胡曉明同運動中心關係密切，眾所周知，胡曉明係胡法光嘅仔。胡曉明日前出席一個湖南省農產品推介活動時透露，會用爸爸嘅名義再捐錢改建胡法光運動中心，估計需要幾億元，希望下年可以開始動工。由於中心冧天花唔可以用，加上改建需時，相信學生有排都未用得住，要耐心等候。
擬增建層數 搵專業人士
胡曉明又透露，既然要改建，都有考慮過會起高一啲，但改建需要考慮到中心嘅結構比較複雜，該中心又與附近兩棟樓宇興建喺同一個基礎之上，考慮到結構問題，估計最多都只能興建一、兩層，仲要搵專業人士設計清楚，到底改建高一啲會唔會影響整幢樓宇的結構，以及有冇機會影響附近樓宇；至於設計方案亦需要經由相關政府部門批准，所以下年先可以展開工程，跟足規矩行事，安全至上。
胡曉明又話，改建中心後，胡法光運動中心嘅名稱會保留，唔會改變，至於改建資金係咪由胡曉明一力承擔呢？他就話「我牽頭啫！」睇嚟城大方面仲會向其他方面籌謀改建費用，中心總算有救喇！不過，一朝被蛇咬，十年怕草繩，中心改建後嘅屋頂會唔會再加設綠化植被呢？相信現階段冇人答得出，亦唔敢貿然提出建議，唔知校方最終會唔會因塌頂陰影而放棄綠化植被屋頂呢？