中環出更：各地佳餚雲集 搵食唔難
俗語話「民以食為天」，無論經濟環境幾咁不景，食嘢醫肚都係唔慳得。香港美食博覽會前日喺灣仔會展開幕，來自世界各地嘅美食佳餚匯聚一堂，吸引唔少名人入場「搵食」。卓妮見到身兼香港——台灣商貿合作委員會主席嘅中華廠商聯合會副會長吳永嘉（Jimmy）喺台灣展區試食滷味鴨舌，佢話年年都會入場巡吓，若有啱食嘅就會入貨自己食或送贈朋友。
Jimmy話，佢好鍾意台灣小食，其中滷味因為口味同香港差唔多，所以都啱胃口。佢仲即場買咗幾包由高雄夜市起家嘅人氣滷味鐵蛋及鴨舌，唔通用來當送酒小食？Jimmy笑笑口話唔係，用嚟送禮就真喎！農產品豐富嘅湖南省亦趁機舉行推介會，中華出入口商會會長張學修、香港總商會中國事務委員會副主席譚唐毓麗、香港食品委員會主席陳建年及港九茶葉行商會理事長譚松發等人都去撐場。
家族做米生意嘅陳建年話，雖然佢哋冇入口湖南農產品，但都特登過來了解吓，睇吓有咩商機。湖南黑茶近年喺香港廣為人知，譚松發解釋話，過去湖南黑茶多數銷往內蒙古等邊境城市，前幾年因為普洱茶價格被炒高，大家先至留意到湖南黑茶。不過講到尾，港人始終飲雲南普洱茶居多。
譚松發爛棉襖形容茶行
家族做茶行生意嘅譚松發已係第三代，佢話雖然依家經濟市道唔好，但係做茶葉批發呢行都唔會衰得去邊，因港人有根深柢固嘅飲茶文化，形容做茶行好似一件爛棉襖咁，爛極都仲保暖喎！
卓妮