政情：網台莫財 卿姐做節目四圍騰
立法會議員劉慧卿每星期都會喺一個網台節目訪問下啲政界名人，但近半年個節目好似突然消失咗咁，唔少人都覺得好奇怪。卿姐尋日就改咗個場地再次錄影節目，仲一次過錄咗兩集添，究竟因咩事卿姐「被消失」咗半年？問卿姐點解成半年無錄影，佢就話因為無場地喎。
要自掏腰包租場
據了解，原來負責製作節目嘅OurTV，因為嫌一直租開嘅天后場地太貴，所以決定唔租，令卿姐個節目都焗住停埋。
而早兩個月，卿姐想約香港大學校委會主席李國章做節目，都要自己掏腰包喺觀塘租場。最近網台就搵咗間影樓合作，雖然要去到葵涌做節目，但總算可以再見到卿姐喇，想不到卿姐為咗做節目要去勻晒港九新界。