政情：吳傑莊破解「不羶羊」之謎

暑假向來係學界交流同實習團嘅高峰期，今年四月開始出任香港青年聯會主席嘅吳傑莊（Johnny）近月忙於四圍飛帶團，其中喺剛過去嘅七月份幾乎破咗自己紀錄，一個月去咗內地七個地方咁多，期間去到內蒙古包頭市時仲有開心大發現，有當地人同佢講，內蒙古嘅羊感覺開心嘅就唔會有羶味喎！

Johnny最近於社交網站頻頻貼相，原來佢單單於七月，已經去咗黑龍江、內蒙古、山東、湖南、上海、北京及廣東等最少七個地方。其中喺內蒙古包頭市，佢同一批學生一齊食羊肉，食完之後覺得內蒙古啲羊一啲都唔羶，自言唔知係咪同煮法有關。

就此，Johnny請教當地人，點知對方竟然答佢，因為啲羊開心，有足夠空間喺草原度跑，所以冇咁羶之餘肉質仲特別唔同；此外，當地仲有羊奶奶茶飲，不過就羶好多，Johnny飲咗一啖就飲唔落喇。