怪事處處有，香港特別多。功夫茶今日想同大家研究一件怪事，就係影視劇中高大威猛嘅消防英雄，現實中竟然被鼠輩上門欺負，搞到一大堆人入院求醫都唔敢畀人知，都咪話唔失威。
係咁嘅，位於將軍澳百勝角嘅消防及救護學院日前驚爆集體食物中毒事件，七十多名學員食完早餐冇耐就上吐下瀉，部分學員仲係前一晚已經出事，屙到發軟蹄咁滯，結果連操練都捱唔住，名副其實出師未捷先跪低。搞成咁，唔使問阿貴都知梗係食物不潔惹的禍喇，查實學院今年三月先至啟用，照計樣樣嘢都新簇簇，加上有專人煮食，冇理由咁都賴嘢嘅喎。
其實有乜咁出奇吖，學院鄰近堆填區，一直備受鼠患困擾，啟用四個多月咋，已經捕獲三十幾隻老鼠。有學員仲話，每逢夜晚都會見到幾十隻老鼠喺廚房搵食，好似操兵咁款，學員飯堂變成老鼠餐廳，老鼠先享用，學員接住食，有乜法子唔搞到又屙又嘔吖。
可能驚出醜啩，消防處竟然臭屎密冚，冇按慣常做法召喚救護車將學員送院，反而叫學員靜雞雞自行求醫。可惜紙係包唔住火嘅，事件終於曝光，消防處先至死死地氣承認學院鼠患嚴重，又話學員已經無大礙，否認知情不報喎，呢啲咪叫死雞撐飯蓋囉。嗱，消防處廚師職工會就講得啱嘞，當局為咗慳皮，將廚師工作外判，結果連監管責任都外判埋，簡直靠害。
即係咁，今次出事嘅係學堂初哥，並唔係正式消防員，唔影響救火工作，但消防處對外判制度不監不管，萬一下次食物中毒發生喺正式消防員身上，後果不堪設想。試諗吓，消防員救救吓火突然肚痛跪低，隨時搞出人命都似。所以話啫，今次事件表面睇係衞生問題，實際上係消防處管理混亂嘅問題，消防員自身都難保，仲點樣保護市民喎。
唔係誇張o架，上次牛頭角迷你倉工廈大火，已經有消防員炮轟消防處膳食差，淨係識縮皮外判，搞到一班手足出生入死都冇啖好食，影響士氣，證明外判制度問題多多。消防處繼續詐傻扮懵咯喎，遲早爆大鑊嘅咋。
冇計嘞，消防處出名管理混亂，醜聞一大籮，申訴專員公署最近先至踢爆消防官僚失職卸責，對違反消防條例嘅大廈改建工程闊佬懶理。至於消防處流行擦鞋文化更係唔在講，每逢新官上場，例必勞民傷財大搞檢閱騷，反而救火設備甩漏就關人個關，之前仲發生消防喉穿窿「軟水救近火」嘅荒謬事件添。咁你話嘞，消防處不務正業，烏煙瘴氣，有乜辦法唔蛇鼠一窩吖！