本土民主前線的梁天琦日前獲通知未符合立法會參選資格，代議士之路被阻，佢嬲到爆，大數香港「十大罪狀」，除批評今次是有篩選的選舉，又指香港冇法治，係「人治、獨裁」。他義憤填膺，忽然孫中山上身，稱「革命」是唯一方法，之不過佢又沒有正面回應革命嘅實際手段。
講起革命，老朽自不然想起毛主席語錄：革命是暴動，是一個階級推翻一個階級的暴烈的行動。而要從事革命，毛澤東說得明白，要「下定決心，不怕犧牲，排除萬難，去爭取勝利」。梁天琦一心想做代議士，做個「尊貴的議員」，其志大矣！眼見那些激進的代議士高薪厚酬，只要拉拉布或是不出席會議，製造流會，或是狂呼大喝，撒吓溪錢飛吓雜物；較斯文嘅，就睇吓艷照，或神遊太虛搵周公，總之各適其適，咁就一年容易又散會，後生仔心動轉軚簽確認書可以理解，如今邁向代議士之路被阻，唔嬲就假。
香港確係革命聖地，老朽讀香港歷史博物館前總館長丁新豹的《香江有幸埋忠骨》，談當年在香港籌劃革命活動的孫中山，以及長眠香港與辛亥革命有關的人物，想起他們的英雄事迹，為國為民，以硬肩負重任，以強臂挽危局，而一些狂書生真名士更令人敬仰，像譚嗣同、陳天華、林覺民等，更是「莫道書生空議論，頭顱擲處血斑斑」，對他們而言，「革命」兩字有千斤重。
至於梁天琦，有論者指當局即使達到目的，但勢產生後遺症，變相為本土派催票，且令他短期內有更多表演機會。有機會扮演「港獨派」代表人物，亦算是「意外收穫」，之不過搞港獨除了是偽命題，亦不會真正有甚麼市場。香港呢個「福地」，壞於冇神經政府，再毀於一些無知的「革命」激進分子，香港未來只會無事亂喧嘩，繼續內耗空轉，未「革命」成功已經失血過多，寧不悲乎？