政情：袁莎妮：企業開戶審查咪一刀切
早前香港眾志秘書長黃之鋒喺組黨期間被銀行拒絕開戶，當時有解釋話銀行對政治人物嘅戶口特別嚴格，以免戶口被人用嚟洗黑錢。除咗政界中人，近日甚至連商界都話開戶口愈來愈困難，連香港總商會總裁袁莎妮（Shirley）都出聲話，企業想開銀行戶口唔單止要經過繁瑣同冗長嘅過程，仲要唔一定成功，搞到好多中小企和新公司都受影響，更令香港友善營商嘅聲譽受損。
根據業務性質調整
其實全球金融機構為咗打擊洗黑錢及恐怖分子融資等活動，都加強戶口風險管理，稱為「去風險化」，結果連同本港銀行在內，任何人開戶口嘅難度都有增無減。總商會尋日就此舉行論壇，Shirley覺得大型企業和初創企業本質唔同，所以審查亦應該有所不同，認為唔應該「一刀切」處理。佢又指銀行應保持彈性，審查細節應根據業務性質等因素調整，簡單嚟講，如果係老字號大公司，點解仲要查咁多先？Shirley話，已經將業界嘅意見交畀金融管理局，局方亦宣布已經就金融機構處理新舊客戶制訂指引。