政情：免費電視牌惹火 蘇錦樑收埋
今屆政府將於明年中完成任期，多個政策局都對爭議政策採取迴避態度，其中一個燙手山芋就係免費電視發牌。政府三年前因為不發牌畀香港電視，搞到滿城風雨，依家香港電視以及永升亞洲都排緊隊申請免費電視牌照，仍待行政會議審批。有政府中人分析，呢個計時炸彈，無論如何都唔會喺明年三月特首選舉前揭盅，商務及經濟發展局局長蘇錦樑（Greg蘇）會唔會又要搬出「一籃子」因素做擋箭牌拖得就拖，真係要拭目以待。
早前有報道指，特首梁振英要求各政策局匯報及預告，未來一段時間會有乜政策可能引發社會爭議，及早做定防風措施，以免影響建制派嘅立法會選情，其中一個惹火政策就是免費電視發牌。
上次發牌 拖足三年
相信大家都記得，香港電視、奇妙電視及香港電視網絡，早於○九年已向政府申請免費電視牌照，但政府拖足三年幾，到一三年才公布，奇妙電視及香港電視網絡獲發牌，但香港電視就不獲發牌，被人批評「搬龍門」，加上Greg蘇一直以行政會議保密制及「一籃子」因素為由作解釋，結果引發十二萬人包圍並佔領政府總部「公民廣場」。
兩台申請 一齊審視
政府早前透露，通訊事務管理局已完成審批香港電視申請免費電視牌照程序，今年一月已將建議交由特首會同行政會議考慮，至於永升亞洲嘅申請，截至六月初嘅說法，通訊局仍然係處理當中。有政府中人指，行政會議大條道理要等埋通訊局完成審議永升亞洲嘅申請，先會一次過審視兩項申請。
亞視今年結業，依家有兩間電視台申請免費電視牌照，政府一向都被指唔想發牌畀香港電視，今次或者可以只發牌畀永升亞洲，但此舉又隨時會引發新一輪爭議。講到尾，政府似乎唔想喺特首選舉前引爆呢個潛在炸彈，所以幾乎肯定會交由下屆政府處理。不過，Greg蘇可唔可以留任下屆政府實在好難講，但無論到時邊個主理發牌，相信都會舉步維艱。