中環出更：反港獨示威 選管會變選委會
選舉事務處早前裁定六人被取消立法會選舉參選資格，理由係主張港獨或香港建國，團體「同心護港」一批成員尋日到選舉管理委員會位於灣仔嘅總部請願，要求選管會堅決拒絕港獨人士參選。不過，佢哋嘅新聞稿、橫額連番「甩轆」，錯漏百出，竟然將選管會錯寫為負責選出明年三月特首、由一千二百人組成嘅選舉委員會。
錯字連篇 議員變「譏員」
「同心護港」遞交予有關方面嘅請願信出錯，抬頭係「選舉委員會」五個字，但令人摸不着頭腦嘅係，選管會方面照樣派代表接收請願信，唔通選管會做埋速遞，幫手轉送請願信？此外，「同心護港」嘅新聞稿另有多處「甩轆」，首先係新聞稿第一段，繁體字及簡體字夾雜，部分字眼如港獨等未有「簡轉繁」，議員錯寫為「譏員」等。
資料顯示，選管會主席為馮驊，而選舉事務處係選管會嘅行政部門，協助選管會有效地執行選管會條例所規定嘅法定職能，並執行選管會就地方選區、選舉事宜等所作出嘅決定。
卓妮