中環出更：石頭當寶 吳肖梅開舖賣珍藏
台灣駐港機構近期出現人事變動，經濟部駐港代表遠東貿易服務中心主任陳愛蘭、文化部駐港代表光華新聞文化中心主任盧健英，相繼喺八月初離任返台，國際華商協進會（華商會）早前特意設宴為兩人餞行。華商會會長羅台秦、副會長吳肖梅等人都有到場。吳肖梅係亨達集團創辦人鄧予立太太，佢哋喺台灣投資多年，除咗老本行金融業之外，仲有IT公司及石頭店，其中石頭店成立原來有一段有趣嘅故事。
近年鄧予立已經半退休，周圍去旅行歎世界，期間喺各地搜羅唔少奇珍異石，包括化石。吳肖梅笑笑口話，後來愈買愈多，屋企都擺唔落，所以索性開店賣石頭。不過，香港租金昂貴，所以就去台北開店，結果生意又唔錯喎。香港人鍾意旅行減壓，如果周遊列國之餘仲可以出售戰利品做吓生意，又諗得過喎！
倪伯嘉履新 駐港「命中注定」
同場仲有港澳台灣同鄉會名譽會長賴李承美、華商會前會長陳趙滿菊及好多後生靚女，包括港澳台灣慈善基金會主席張佐民千金張兆馨及畫家定如淨，大家同聲同氣傾得特別投契。陳愛蘭來港五年幾，今次返台升職；而已經履新嘅新主任倪伯嘉就笑言，派駐香港係「命中注定」，事關由讀大學起已三次嚟香港交流或見習，同香港確有緣分。
至於來港三年幾嘅盧健英係辭職離開官場，做記者出身嘅佢亦係舞蹈評論家，佢話希望將來有機會成為華商會一員，唔通係想踏入商界？
卓妮