提起斷橋奇觀，大家肯定會諗起西湖十景之一嘅西湖斷橋，呢度仲係《白蛇傳》白娘子同許仙相會之處，簡直浪漫到殺死人。其實香港都有好多斷橋o架，不過浪漫就冇份，醜死怪就有之。
唔講唔知道，一講嚇一跳，全港「半途而廢」嘅斷橋多達二十一處，梗有一條喺左近。嗱，好似其中一條位於荃灣荃青交匯處嘅斷橋咁吖，八十年代已經規劃興建，當時政府諗住將荃灣發展為新市鎮，分三階段擴闊德士古道天橋以配合交通需求。有關斷橋屬第二階段工程，原擬配合第三階段工程接駁行車天橋，點知人算不如天算，第三階段工程無限期擱置，斷橋擺喺度成廿幾年，問你服未。
咁都未算呀，大嶼山竹篙灣公路一段行車天橋同樣起到一半就無疾而終。事關九七回歸嗰陣，當局雄心壯志要發展大嶼山，諗住起條天橋接駁北大嶼山公路至市區，到頭來又係議而不決，發展大嶼山龜行蝸步，卒之搞到條斷橋吊吊揈到今時今日，你話係咪浪費公帑吖？係咪貽笑大方吖？
最離譜嘅係，運輸署及路政署對於幾時復工顧左右而言他，一味推說會適時檢討喎。喂，呢啲斷橋閒閒哋擺咗十幾廿年，有幾條仲足足閒置三十幾年，當年出生嘅BB都人到中年嘞，港府竟然仲未完成檢討，搵藉口都搵個似樣啲喇。所以話啫，斷橋唔止係浪費民脂民膏嘅證明，仲係港府施政無能嘅恥辱碑。
有專家就同港府講好話，指當局進行規劃時，提前建造接駁位係非常普遍嘅做法，事關唔咁做嘅話，日後要喺正在運行嘅交通系統上進行接駁，會有技術困難，仲會令工程費用提高添。講係咁講喇，不過就算提早建造接駁位，使唔使提早廿幾三十年咁誇張呀？再講吖，港府連有數得計嘅財政收益都年年估錯，又有乜可能準確預知幾十年後嘅交通需求係點喎。
講多無謂，睇吓港府嘅往績最實際。就講發展大嶼山吖，由九七年噏到家陣都係得個噏字，證明當局亂噏當秘笈已成慣例。再睇吓高鐵及港珠澳大橋工程，延誤超支當食生菜，連國家級基建都搞到一鑊泡。咪話唔提醒，港珠澳大橋嘅珠海段同澳門段進展順利，唯獨香港段又係拖拖拉拉，隨時又出現斷橋，咁就由世界奇迹變世界笑柄嘞。
一句講晒，港產官僚冇嘢叻，最叻就係頭腦發熱胡亂去馬，衰咗又唔使問責，公帑多多都唔夠嘥喇。難為瑞士洛桑管理學院早前居然將港府嘅管治效率評為世界第一喎，如果佢哋嚟香港實地考察吓，唔O嘴至奇。