政情：公民講場：粗口民主牆 大學生丟架

近年本港大專界漸趨政治化，當中香港大學及中文大學多次被捲入政治漩渦，由兩校學生會管理嘅民主牆成為學生發洩政治不滿嘅平台，近期甚至有人張貼粗口字眼作出人身攻擊。在學生會縱容下，象徵大學民主、言論自由嘅民主牆慘淪為市井之徒嘅粗口牆。繼港大民主牆有人貼上粗口字眼辱罵港大校委會主席李國章後，尋日中大民主牆亦出現針對選管會嘅大字報，其中出現粗言穢語「選管會我X你老母」。雖然選管會嘅裁定的確惹來各界批評，但係身為大學生係咪詞窮到要用粗口去表達意見呢？粗口歌王尹光首《何必講粗口》，真係啱晒啲大學生聽吓！