政情：三個Ricky 掌控廉署執行處
廉政公署上月因為廉政專員白韞六取消李寶蘭署任執行處首長，鬧得滿城風雨，接替李寶蘭嘅丘樹春更一度遞信，逼到白韞六要急急搵番做過廉署、監警會前秘書長嘅朱敏健回巢救亡，最終丘樹春亦喺同事強烈挽留下留任，結果無意間令執行處最高權力核心出現「3R」格局。
朱敏健資歷深 破案無數
咩叫「3R」？原來執行處福祿壽，即是署理首長丘樹春、兩位處長余振昌及重返廉署嘅朱敏健，佢哋嘅英文名都係叫Ricky，真是有咁啱得咁蹺，所以依家喺廉署叫Ricky，要叫埋個姓至得，否則隨時搞亂。
若要數「3R」，以朱敏健資歷最深，亦破過無數大案，包括佳寧案、稅務局前局長單羅玉蓮騙取房津案等，又曾任防貪處處長。至於余振昌更加唔使講，前政務司司長許仕仁案亦係由佢帶領嘅專責小組偵破，並已正式升任為處長。據知「2R」目前最重要係協助丘樹春穩定軍心，希望唔再有人「劈炮」。
至於近日成為眾矢之的嘅白韞六，泛民主派最近曾約佢會面，了解廉署近日發生嘅一連串風波，但已被婉拒。