政情：吳永嘉入立會 「最好冇人識」
進身立法會成為議員，增加知名度，相信係唔少政圈中人嘅目標，但候任工業界（第二）立法會議員吳永嘉（Jimmy）就似乎背道而馳，仲話「最好四年之後都冇人識。」唔通Jimmy想效法某位因為政改甩轆而冒起嘅功能界別議員？
Jimmy尋日解釋，佢話最好冇人識只係純粹講笑，但就認為自己作為議會新丁，行事都係謙虛、低調啲好。被問到會唔會好似該界別現任議員咁，經常向教育局局長吳克儉等政府問責高官開火，Jimmy就話自己唔識教育嘅嘢，而且唔係佛教徒，唔識引用佛偈妙語連珠喎。
保持自由身 拒結聯盟
立法會事務繁忙，Jimmy本身都有唔少公職，會唔會考慮好似過往啲無黨派功能界別議員咁，結成聯盟分工合作呢？Jimmy就話，自己始終都係代表中華廠商聯合會，投票都要跟番廠商會嘅立場，所以都係保持自由身好啲，以免同人結盟後投票立場有出入，衍生尷尬喎。